முஸ்லிம்களுக்கு இடஒதுக்கீட்டை மறுப்பது மத பாரபட்சம்: செய்யத் ஷஹாபுத்தீன்

புனே:முஸ்லிம்களுக்கு இடஒதுக்கீட்டை வழங்குவது அவர்களின் மதத்தின் அடிப்படையில் அல்ல என்றும் அது அவர்களின் பிற்ப்பட்ட நிலையை கணக்கில் கொண்டு என்று முன்னாள் எம்.பியும் முஸ்லிம் இந்தியா என்ற பத்திரிகையின் எடிட்டருமான செய்யத் ஷஹாபுத்தீன் கூறினார். பாப்புலர் ஃப்ரண்ட் ஆஃப் இந்தியா ரங்கநாத் மிஷ்ரா கமிஷன் முஸ்லிம்களுக்கு இட ஒதுக்கீடு வழங்க அளித்துள்ள சிபாரிசுகளை நடைமுறைப்படுத்தக் கோரி நடத்தும் இடஒதுக்கீடு பிரச்சார இயக்கத்தின் துவக்கமாக மஹராஷ்ட்ரா மாநிலம் புனேவிலிலுள்ள மகாத்மா ஜோதி பூலே நகரில் நடைபெற்ற மாபெரும் பொதுக்கூட்டத்தை துவக்கி வைத்து உரையாற்றினார் அவர்.

மேலும் அவர் உரையாற்றியதாவது,"மதத்தின் அடிப்படையில் முஸ்லிம்களுக்கு அரசியல் சட்டம் வழங்கும் இடஒதுக்கீட்டு உரிமையை முஸ்லிம்களுக்கு மறுப்பது மதரீதியான பாரபட்சமாகும். முஸ்லிம்களுக்கும், இதர பிற்பட்ட வகுப்பினருக்கும் அளிக்கும் இடஒதுக்கீடு என்பது எவருடைய அன்பளிப்பும் அல்ல. அது அரசியல் சட்டம் வழங்கும் உரிமையாகும். இடஒதுக்கீட்டை 50 சதவீதத்திற்குள் வழங்கவேண்டும் என்று கூறிய சுப்ரீம் கோர்ட்டின் தீர்ப்பை மாற்ற அரசு சட்டம் கொண்டுவரவேண்டும்.

ஒடுக்கப்பட்ட மக்களை சக்திப்படுத்துதலின் ஒரு பகுதியாகத்தான் பாப்புலர் ஃப்ரண்ட் ஆஃப் இந்தியா இடஒதுக்கீட்டிற்கான பிரச்சார இயக்கத்தை துவக்கியுள்ளது என இரண்டு மாதம் நீடிக்கும் பிரச்சார நிகழ்ச்சியில் துவக்கமாக பேசிய பாப்புலர் ஃப்ரண்ட ஆஃப் இந்தியாவின் தேசியத்தலைவர் இ.எம்.அப்துற்றஹ்மான் தெரிவித்தார்.

அவர் தனது உரையில், "ஒடுக்கப்பட்ட மக்களின் உரிமைப் போராட்டத்தில் முக்கிய பங்கு வகித்த பூலே மற்றும் அம்பேத்காருடன் நெருங்கிய தொடர்புடைய புனே நகரத்திலிருந்து இடஒதுக்கீட்டிற்கான பிரச்சார இயக்கத்தை துவக்கியதற்கு வரலாற்று ரீதியான முக்கியத்துவம் உள்ளது. சச்சார் கமிட்டி முஸ்லிம்களின் பிற்பட்டநிலைக்கான காரணங்களை கண்டறிந்தது. அதற்கான பரிகாரத்தை சிபாரிசுச் செய்துள்ளது மிஷ்ரா கமிஷன். ஆனால் கல்வி-வேலைவாய்ப்பில் முஸ்லிம்களுக்கு 10 சதவீதம் இடஒதுக்கீடு வழங்கவேண்டும் என்ற கமிஷனின் சிபாரிசுகளை நடைமுறைப்படுத்த மத்திய அரசு இது வரை தயாராகவில்லை.

முஸ்லிம்களுக்கு இடஒதுக்கீடு வழங்குவது தொடர்பாக அனைத்துக் கட்சிகளும் தங்களது நிலைப்பாட்டை தெரிவிக்கவேண்டும். முஸ்லிம்களின் எவருடைய கருணையையும் எதிர்பார்க்காமால் அவர்கள் சொந்தமாகவே போராட்டத்தை துவக்கவேண்டும். எனக்கூறினார் அவர்.

இந்நாட்டில் அனைத்து சமூக மக்களும் முன்னேறினால்தான் நாட்டின் முன்னேற்றம் சாத்தியமாகும் என்று நேசனல் செக்யூலர் ஃபாரம் தேசிய கண்வீனர் சுரேஷ் கைர்னார் கூறினார். இப்பொதுக்கூட்டத்தில் மவ்லானா உஸ்மான் பேக் ரஷாதி (தலைவர்,ஆல் இந்தியா இமாம்ஸ் கவுன்சில்), அப்துல் ஹன்னான்(எஸ்.டி.பி.ஐ பொதுச்செயலாளர், கர்நாடகா), சுபாஷ் வாரே(ஒருங்கிணைப்பாளர், மஹாரஷ்ட்ரா மூன்றாவது முன்னணி), ஹாஃபிஸ் மன்சூர் அலி கான்(தலைவர், முஸ்லிம் ஆரக்‌ஷன் சங்கர்ஷ் சமிதி, ராஜஸ்தான்), மவ்லானா ராஸின் அஷ்ரஃப்(இமாம்ஸ் கவுன்சில் மாநிலத்தலைவர், மஹாராஷ்ட்ரா), லியாக்கத் அலிகான்(தலைவர், எஸ்.டி.பி.ஐ, மஹாராஷ்ட்ரா), ஸாதிக் குரைஷி(கண்வீனர், பாப்புலர் ஃப்ரண்ட் ஆஃப் இந்தியா, மஹாராஷ்ட்ரா), முஹம்மது ஸாஜித்(நிகழ்ச்சி கண்வீனர்) ஆகியோர் உரைநிகழ்த்தினர்.

இப்பொதுக்கூட்டத்தில் மஹாராஷ்ட்ரா மாநில பாப்புலர் ஃப்ரண்ட் ஆஃப் இந்தியாவின் அட்ஹாக் கமிட்டி தலைவராக சித்தீக் குரைஷியும், முஹம்மது ஸாஜித் செயலாளராகவும் அறிவிக்கப்பட்டனர்.

இக்கூட்டத்தில் ஆயிரக்கணக்கான மக்கள் கலந்துக் கொண்டனர். வழக்கத்திற்கு மாறாக இக்கூட்டத்தில் பெண்கள் அதிகளவில் கலந்துக் கொண்டனர். 16 மாநிலங்களில் நடைபெறும் இடஒதுக்கீட்டிற்கான பிரச்சார இயக்கம் மார்ச் 18 ஆம் தேதி பாராளுமன்ற அணிவகுப்பைத் தொடர்ந்து நிறைவுறும்.

செய்தி:தேஜஸ் மலையாள நாளிதழ்

முஸ்லிம்களுக்கு இடஒதுக்கீடு: குட்டிக்கரணம் போடும் மத்திய அரசு

முஸ்லிம்களுக்கும் இதர சிறுபான்மையினருக்கும் இடஒதுக்கீட்டை அமுல்படுத்த வேண்டும் என்ற ரங்கநாத் மிஷ்ரா கமிஷனின் சிபாரிசை நடைமுறைப்படுத்துவது தொடர்பாக காங்கிரஸ் தலைமையிலான மத்திய அரசு குட்டிக்கரணம் போட்டுவருகிறது.

இது தொடர்பான கேள்வியொன்றிற்கு பதிலளித்த சிறுபான்மை நலத்துறை அமைச்சர் சல்மான் குர்ஷித் பத்திரிகையாளர்களுக்கு பேட்டியளிக்கையில் பட்டும் படாமலும் மழுப்பலான பதிலை கூறியுள்ளார்.

அவர் கூறியதாவது: சிறுபான்மையினருக்கு இடஒதுக்கீடு வழங்குவது தொடர்பாக காங்கிரஸின் தேர்தல் அறிக்கையில் தெளிவாகக் கூறப்பட்டுள்ளது. முஸ்லிம்களில் பிற்பட்டோர்களுக்கு மக்கள் தொகையின் அடிப்படையில் இடஒதுக்கீடு வழங்கியுள்ள கர்நாடகா-தமிழ்நாடு மாநில அரசுகளின் முன்மாதிரியை தாங்கள் பின்பற்ற விரும்புகிறோம். நீதிமன்றமும் இதனை அங்கீகரித்துள்ளது.அது செயல்படுத்தப்பட்டால் ரங்கநாத் மிஷ்ரா கமிஷனை நடைமுறைப்படுத்த தேவையில்லை. இதுத்தொடர்பான விஷயத்தில் ஆந்திர உயர்நீதிமன்றத்தின் தீர்ப்பிற்காக காத்திருப்பதாகவும் அத்துடன் இதுத்தொடர்பான சட்டரீதியான தடை நீங்குமென்றும் அவர் மேலும் தெரிவித்தார்.

சமூக பிரச்சனைகள் தொடர்பான எடிட்டர்ஸ் கான்ஃப்ரன்சில் கலந்துக் கொண்ட சல்மான் குர்ஷித் பத்திரிகையாளர்கள் ரங்கநாத் மிஷ்ரா கமிசன் தொடர்பாக கேட்ட கேள்விகளுக்கு பதிலளித்தார். மத மொழி சிறுபான்மையினருக்கான தேசிய கமிஷனான ரங்கநாத் மிஷ்ரா கமிஷன் சிறுபான்மையினருக்கு 15 சதவீத இடஒதுக்கீடு வழங்கவேண்டுமென்றும் அதில் 10 சதவீதத்தை முஸ்லிம்களுக்கு வழங்கவேண்டுமென்றும் சிபாரிசுச்செய்திருந்தது.

இவ்விஷயத்தில்தான் முஸ்லிம்களை முற்பட்டோர் பிற்பட்டோர் என பிளவுப்படுத்தி கண்ணாமூச்சி விளையாட்டை ஆடிக்கொண்டிருக்கிறது மத்திய அரசு இதற்குத்துணையாக காங்கிரசின் தேர்தல் அறிக்கையை காரணம் காட்டுகிறது. சிறுபான்மையினரில் பிற்பட்டோருக்கு எத்தனை சதவீதம் இடஒதுக்கீடு வழங்கப்படும் என்பது பற்றி தெளிவுப்படுத்தவும் சல்மான் குர்ஷித் தயாரில்லை.

மிஷ்ரா கமிஷன் அறிக்கையை எப்பொழுது நடைமுறைப்படுத்துவீர்கள்? என்ற கேள்விக்கு தங்களின் தேர்தல் அறிக்கையில் கூறப்பட்டுள்ள சில விஷயங்கள் மிஷ்ரா கமிஷன் அறிக்கையின் சிபாரிசுகளோடு ஒத்துப்போகிறது. ஆதலால் அதனை முதலில் நடைமுறைப்படுத்துவோம் என்றும் சல்மான் குர்ஷித் பதிலளித்தார்.

சிறுபான்மையினரில் பிற்பட்டோருக்கு கர்நாடகா-தமிழ்நாடு மாநில அரசுகளின் முன்மாதிரியில் இடஒதுக்கீட்டை செயல்படுத்துவோம் என்று காங்கிரஸ் தேர்தல் அறிக்கையில் வாக்குறுதியளிக்கப்பட்டிருந்தது. அது மிஷ்ரா கமிஷனின் ஒரு பகுதியை நடைமுறைப்படுத்துவதற்கு சமம் என சல்மான் குர்ஷித் கூறுகிறார்.மிஷ்ரா கமிஷன் சிபாரிசுகள் பல அமைச்சகத்தோடும் தொடர்புள்ளதன் காரணமாக அமைச்சரவை இதுத்தொடர்பாக ஒருங்கிணைந்த முடிவை எடுக்க வேண்டியுள்ளது என்றும் குர்ஷித் தெளிவுப்படுத்தினார். மேற்க்கண்ட சல்மான் குர்ஷிதின் பேட்டியில் உள்ள முரண்பாடுகளை நாம் புரிந்துக்கொண்டிருப்போம்.
செய்தி:தேஜஸ் மலையாள நாளிதழ்